Папулярызацыя беларускай мовы
План мерапрыемстваў па папулярызацыі і пашырэнні сферы выкарыстання беларускай мовы
План мерапрыемстваў па папулярызацыі і пашырэнні сферы выкарыстання беларускай мовы ва ўстанове адукацыі “Магілеўская дзяржаўная гімназія-каледж мастацтваў”
на 2019/2020 навучальны год (паглядзець тут)
Турнір «Знаўцы роднай мовы»
13.12.2019
12 снежня ў 2 Б класе адбыўся турнір «Знаўцы роднай мовы». Вучні размаўлялі на роднай мове аб прыгажосці нашай краіны і сімвалах Беларусі. Разгадвалі крыжаванку пра птушак і чыталі апавяданні пра дапамогу птушкам у зімовы перыяд. Паўтаралі асаблівасці напісання слоўнікавых слоў.
Класны кіраўнік Мароз Т.М.
Віктарына «Пазнай твор па першых радках”
05.12.2019
5 снежня 6 класам настаўнікі беларускай мовы прапанавалі віктарыну «Пазнай твор па першых радках”, 5 класам - крыжаванкі, дзе трэба было запісаць пераклад слоў з рускай мовы на беларускую. На перапынках вучні, неабыякавыя да беларускай літаратуры, успаміналі творы, якія вывучалі раней. Сярод іх былі як класічныя творы (вершы М. Багдановіча “Маёвая песня”, “Вадзянік”, паэма “Курган” Я.Купалы, раздзелы з паэмы “Новая зямля” Я. Коласа), так і творы сучасных аўтараў (“Жураўлі на Палессе ляцяць” А. Ставера, “Два полі “ А.Вярцінскага, “Камень ля вёскі Камень” К.Камейшы, “Маці” С.Грахоўскага і г.д.). Дзеці заўсёды з ахвотай удзельнічаюць у такіх віктарынах, бо гэта магчымасць праявіць сябе знаўцам беларускай літаратуры. Вельмі прыемна, што на вялікую колькасць пытанняў дзеці змаглі даць правільныя адказы без дадатковых падказак!
Настаўнік беларускай мовы і літаратуры Дабравольская І.В.
«Якая яна, наша Беларусь?»
28.11.2019
Слаўлю я свой край любімы,
Незгасальную зару.
Як ты сэрцу майму міла,
Дарагая Беларусь!
28 лiстапада ў 1А класе адбыўся час размовы на роднай мове на тэму «Якая яна, наша Беларусь?» Дзецi пабывалi на завочнай экскурсіi па выставе вырабаў народных рамёстваў, пазнаёмiлiся з відамi дэкаратыўна-прыкладнога мастацтва, народным касцюмам, паўтарылi сiмвалы Рэспублiкi Беларусь, а таксама адгадвалi загадкі i рабілi паштоўкі«Я люблю Беларусь!»
Выхавальнік ГПД: Мурзянкова В.А.
Акцыя «Мультфільмы на беларускай мове»
22.11.2019
21 лістапада ў гімназіі-каледжы прайшла акцыя «Мультфільмы на беларускай мове» ў 5 і 6 класах. Для вучняў гэтага ўзросту гэта вельмі эфектыўны спосаб зацікавіць роднай мовай і пашырыць лексіку. Вучні з цікавасцю прагледзелі відэаролік “Будзьма беларусамі”, дзе ў сціслай форме пазнаёміліся з асноўнымі фактамі беларускай гісторыі, мультфільмы “Піліпка”, “Прыгоды Несцеркі”. Пасля прагляду вучні выказалі пажаданне часцей праводзіць такія акцыі.Настаўнік беларускай мовы і літаратуры Дабравольская І.В.
«У Беларусі шмат куткоў, не горшых за заморскія»
14.11.2019
У 2А класе была праведзена класная гадзіна на тэму «У Беларусі шмат куткоў, не горшых за заморскія». Вучні пашырылі веды аб Беларусі; пазнаёміліся з цудоўнымі мясцінамі нашай краіны, з задавальненнем удзельнічалі ў стварэнні адзінай прэзентацыі, а таксама дзяліліся сваімі творчымі работамі. Дзеці даведаліся аб Белавежскай пушчы, Мірскім замку, пра Дзяржынскую гару, возера Свіслач, пазнаёміліся з самымі цікавымі месцамі роднага горада.
Акцыя “Маё любімае слова па-беларуску”
31.10.2019
Ільняная і жытнёвая. Сялянская.
Баравая ў казачнай красе.
Старажытная. Ты самая славянская.
Светлая, як травы ў расе.
Вобразная, вольная, пявучая,
Мова беларуская мая!
П.Панчанка
Cёння ў свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна мова, якая завецца роднай. Менавіта на гэтай мове ён размаўляе з роднымі, сябрамі, знаёмымі. І вельмі дрэнна, калі чалавек пачынае забывацца на сваю мову, не шануе яе.
31 кастрычніка ў гімназіі-каледжы прайшла акцыя “Маё любімае слова па-беларуску”. На перапынках вучні пісалі на плакаце беларускія словы, якія з’яўляюцца блізкімі і дарагімі для іх. Хтосьці пісаў сваё імя, але большасць палічыла самымі дарагімі словамі “матуля”,“бацькі”, “сям’я”, “сябар”, “радзіма”,” Беларусь”. Акцыя вызвала сапраўдны інтарэс сярод навучэнцаў 5-9-ых класаў, настаўнікі таксама праявілі цікаўнасць. За кожнае слова дзяцей чакаў салодкі прыз - цукеркі.
Правядзенне такіх акцый несумненна спрыяе павышэнню цікавасці да роднай мовы і ярка ілюструе, што наша родная мова варта таго, каб гаварыць на ёй.
Настаўнік беларускай мовы і літаратуры Дабравольская І.В.
Падарожжа “Беларусь – мая Айчына”
25.10.2019
Падарожжа “Беларусь – мая Айчына” адбылося 24 кастрычніка ў 3А класе… Вучні разам з Буслікам завочна павандравалі па роднай зямлі, пашырылі веды пра вялікіх і славутых людзей Беларусі. Яны з задавальненнем чыталі вершы, складалі прыказкі, разгадвалі крыжаванку і малявалі карціны роднага краю. Напрыканцы мерапрыемства дзеці падаравалі адзін аднаму рознакаляровыя далоні з пажаданнямі шчасця і дабрабыту. А роднай Беларусі яны паабяцалі добра вучыцца, каб зрабіць у будучым сваю краіну яшчэ больш прыгожай і багатай.
С.А.Сідарэнка, выхавальнік ГПД
Экскурс "З вялікага бору - у вялікае жыццё"
17.10.2019
У чарговы беларускамоўны чацвер у госці да навучэнцаў 9-ых класаў прыходзілі супрацоўнікі бібліятэкі імя У.І.Леніна з літаратурным экскурсам "З вялікага бору - у вялікае жыццё" пра жыццё і творчасць І.Г.Чыгрынава. З вялікім захапленнем і цікавасцю дзевяцікласнікі прасачылі шлях нашага земляка ў свет літаратуры. Ім былі прадстаўлены прэзентацыя, інтэрв'ю з блізкімі пісьменніка, прадэманстраваны ўрыўкі з мастацкага фільма па рамане І.Чыгрынава "Плач перапёлкі". Чакаем новых сустрэч з супрацоўнікамі бібліятэкі.
Настаўнік беларускай мовы і літаратуры Скрыпка І.А.
“Спрыт, знаходлівасць і розум” у першых класах
10.10.2019
12 кастрычніка вучні 1 класаў сталі ўдзельнікамі пазнавальнай віктарыны “Спрыт, знаходлівасць і розум”. Вучні з задавальненнем удзельнічалі ў конкурсах: складалі прыказкі ,адгадвалі загадкі, разгадвалі крыжаванку, спаборнічалі ў конкурсе скарагаворак. Дзеці добра справіліся з усімі заданнямі. Мерапрыемства прайшло весела і цікава, а добры настрой не пакінуў хлопчыкаў і дзяўчынак на працягу ўсяго дня!
Настаўніца 1 “Б” класа Церахава А.Г.
