Радаводы 6-ых класаў

19.09.2019

Корань сілкуе дрэва, дае яму сілу. Расце дрэва, а на ім шмат галінак, лісточкаў. Лісце мяняецца на новае кожную вясну.  Жыццё працягваецца! На працягу некалькіх тыдняў вучні шостых класаў разам з бацькамі складалі радаводы. У кожнай сям’і – сваё дрэва. Спачатку заданне падалося хлопчыкам і дзяўчынкам складаным, але яны з ахвотай узяліся за працу. У выніку шмат невядомых да гэтага часу фактаў і сакрэтаў пра сваіх сямейнікаў адкрылася вучням. Напрыклад, высветлілася, што прадзед Лайковай Ксеніі  - гэта беларускі кампазітар Юрый Семяняка, а ў Кондалевай Яраславы прабабуля са шляхетнага роду. Усе дзеці былі вельмі задаволены сваёй працай і з задавальненнем расказвалі пра свой радавод аднакласнікам.

Настаўнік беларускай мовы і літаратуры  Дабравольская І.В.

Урок-віктарына “Жыву, мой родны край, табой”

12.09.2019

12 верасня вучні 6 «Б» класа наведалі Магілёўскую абласную бібліятэку імя Леніна, у якой зараз праходзяць  Дні адчыненых дзвярэй. Супрацоўнікі бібліятэкі правялі для школьнікаў урок-віктарыну “Жыву, мой родны край, табой”. Па апісанні гістарычнай падзеі, помніка архітэктуры ці прыроды, па прозвішчы вядомага дзеяча вучні здагадваліся, пра які горад ці раён Магілёўскай вобласці ідзе размова. Правільна адказваць дапамагала мультымедыйная прэзентацыя. Калі правільнага адказу не было, супрацоўнікі бібліятэкі дапамагалі папоўніць веды вучняў пра сваю малую радзіму. Тыя, хто з дзяцей быў дагэтуль не запісаны ў бібліятэку, мелі магчымасць гэта зрабіць, многія адразу ўзялі кнігі для чытання дамой.

Настаўнік беларускай мовы Дабравольская І.В.